යටගිය දවස අමුතුඇටද්වීපයේ පළමු මෙත්පල් රජුගේ ධුර කාලය ඇවෑමෙන් සබ්බගොජ්ජා රජු සමග ද්වන්ද සටනකින් ජයගත් දෙවන රාජපස්, වීඩමොරුවා රජු හුදී ජනයාගේ ප්‍රීතිඝෝෂා මැදින් රජකමට පත් වුයේය.. සතුටට පත් මහජනයා පොල්කිරි මුඛයට වත්කරගෙන බත් අහුරුද මුඛයට දාගනිමින් කිරිබත් කමින් විජයග්‍රහණය සැමරුවෝය…..
හැට නම ලක්ෂයක මහජනයා වීදි පුරා පෙනෙන පෙනෙන තාප්ප, බිත්ති පුරා බලිකූටු අඳිමින් අමුතු සතුටක් වින්දෝය..මහා අසනි වැසි ඇද හැලී ගංවතුර ගලා මිනිසුන් මිය යද්දී බයි ගෝත්‍රිකයන් ඒවා “ආශිර්වාද වැසි” ලෙස සැලකුවෝය..රූප සුන්දරී තරඟයකින් අමුතුඇටද්වීපයේ ලමිස්සියක් ජයගත් ඒ කල්හීද රටට සශ්‍රීක කාලයක් උදාවූ බව පවසමින් සතුටු වූහ….අඬබෙර ගසන හෙන්චයියන් රටට සුභ කාලයක් උදාවී ඇතැයි උදම් ඇනුහ.
ඔවුන්ගේ සතුට දෙගුණ තෙගුණ කරනු වස් දෙවන රාජපස් රජු එවකට පැවති කහවනු පහළොවක සක බද්ද කහවණු අටකට පහත හෙලුවෝය. එතෙක් මෙතෙක් ඉතිහාසයේ කුමන රජ කෙනෙක්වත් නොකළ දෙයක් යයි කියමින් බයිගෝත්‍ර ජනතාව මුහුණු පොතේ තම අණසක පතුරමින් ටොයි ජනතාවට උසුළු විසිළු කළහ…සිත් තැවුලට පත් ටොයිගෝත්‍රික ජනතාව තමන්හට නැවත වාරයක් ලැබෙන කල් තම මුඛයත්, පශ්චාත් ප්‍රදේශයත් වසාගෙන පූර්ණ නිද්‍රාවට වැදුනහ.
සක බද්ද පහත හෙළීමෙන් සතුටට පත් ජනයා මෙත්පල් රජුගේ ධුර කාලයේ සිදුවූ මහා බාන්ඩාගාර කොල්ලය, නානා ආක්‍රමණය අමතක කල සතුටින් ජීවත් වීමට තීරණය කළෝය..
කල් යත්ම සක බද්ද පහල හෙලීම නිසා භාණ්ඩාගාරයේ කහවනු හිඳෙන බව දැනුනු දෙවෙනි රාජපස් රජු තම සහෝදර අග රජු පළමු රාජපස් රජු සමග සාකච්චා කර මහා භාණ්ඩාගාරයට කබ්බ ගොබ්‍රාල් පුරෝහිත තුමෝ පත් කිරීමට තීරණය කළෝය….සන්තෝසයට පත් කබ්බ ගොබ්‍රාල් තුමෝ, තම කහවනු අච්චු ගසන අරුම පුදුම මැසිම සමග තම ධූරයේ වැඩ භාර ගත්හ. එතැන් පටන් භාණ්ඩාගාරයේ කහවනු ප්‍රශ්න කිසිවක් ඇති නොවුනි, කහවනු අච්චු ගසන අරුමුඅ පුදුම මැසිම දිවා රාත්‍රී නොබලා කහවනු අච්චු ගසමින් භාණ්ඩාගාරය පිරවීමට කටයුතු කළේය..
මෙසේ මාස දෙක තුනක් ගතවත්ම අමුතුඇටද්වීපයට දුර්බික්ෂයක් ළඟා වුනි
-මතු සම්බන්දයි-
"රස්තියාදුකාර ඇදුරුතුමා" 