ලාල්

අවුරුද්දට ක්ලාස් නිවාඩු නිසා ගමේ ආවා…පොඩි කාලෙ අපි හැදුන තැන….මොන තූත්තුකුඩියක ගිහින් හිටියත් මහගෙදර ළං වෙද්දි අමුතුම අපේ කමක් දැනෙනවා…ඒ ෆීලින්ග් එක වෙන කොහේ ගියත් දැනෙන්නෙ නෑ…

හැබැයි ඉතිං දැන් ඉස්සර වගේ නෙවෙයි….ගමේ ඉන්නෙ අලුත්ම අමුතුම ජෙනරේශන් එකක්..ලොකු කැප් දාලා…ලොකු ටීශර්ට් ඇඳන්…වයසට වඩා මෝරන්න හදන අමුතුම ඇටිටියුඩ් තියෙන සිප්පි කොල්ලො ඉන්නෙ…..

මම උන්ව දන්නෙත් නෑ…උන් මාව දන්නෙත් නෑ….

පරණ මිනිස්සු දැක්කම නම් කට පුරාම හිනා වෙනව ළඟට ඇවිත් කතා කරනව..

අම්මයි තාත්තයිත් දැන් වැඩිය ගමේ නැති නිසා…මහගෙදරත් ටිකක් ගරා වැටිලා….ඒත් අවුරුද්ද නිසා කට්ටිය එන නිසා ගෙදරට අමුතු සිරියාවක් අම්ම ගෙනත් තිබුනා….

මම ගෙදර ආපු ගමන් මගේ සුපුරුදු ප්‍රශ්නෙ අම්මගෙන් ඇහුවා…
“අම්මෙ වතුර තියෙනවද”

කොළඹ වගේ නෙවෙයි….මෙහේ වතුර එන්නෙ දවස් දෙකකට පාරක්….ඒ ආවම ටැංකියට මෝටරෙ ගහලා වතුර පුරව ගන්න ඕන… මේ කාලෙට කොහොමත් පෑවිල්ල නිසා වතුර අඩුයි…..

“හරි හරි බය වෙන්න එපා…ටැංකිය පිරිලා තියෙන්නේ”  කියලා අම්ම මට ඔලුවට කිස් එකක් දුන්නා…

මම බඩු ටික කාමරේ තියලා….එළියෙ වැරැන්ඩා එකට ආවා වාඩි වෙන්න තාත්තත් එතන හිටපු නිසා…

පුටුවෙ වාඩි වෙලා මම තාත්තාගෙන් ඇහුවා

“තාත්තෙ ලාල් මාමට මොකද උනේ?

තාත්තා : “කව්ද? බකට් ලාල්ද?

මම : “ඔව් ඔව්”

තාත්තා: “ඔය ගෙදර ඉන්නෙ”

නම ලාල් උනාට…හැමෝම දන්නෙ “බකට් ලාල්” කිව්වම… පොඩි දවස්වල අපි තුන් දෙනාට ආදරෙන් හිටියෙ…කාටවත් එහෙම කරදරයක් කරපු මනුස්සයෙක් නෙවෙයි….වැඩිය පොතේ දැනුමකුත් නෑ….මාලු බිස්නස් කරන් පාඩුවෙ හිටියා

ඒ වුනාට එක නාගරික මන්ත්‍රී කෙනෙක් හිටිය පොරගේ වැඩේ උනේම මේ ලාල්ට කරදර කරන එක.ලාල්ට විතරක් නෙවෙයි අනිත් මිනිස්සුන්ටත්….

පොරගෙ ලොකුකම පෙන්නන්න මේ මනුස්සයට අම්බානක කරදර කළා…ලාල්ගෙ මාලු ලෑල්ල දවස් දෙක තුනක්ම කැඩුවා…එතනට ඇවිත් කුණුහරුප කියලා සද්දෙ දාලා යනවා…ලාල් ඉතිං හැමදාම වගේ ඉවසන් හිටියා….අරූ දැනන් හිටියේ නෑ හැම මිනිහටම ඉවසීමේ සීමාවක් තියෙනවා කියලා….

මේ සිද්ධිය උනේ අපේ චූටි අම්මගෙ මගුල් ගෙදර දවසෙ…මම එතකොට එක වසරෙ හරි දෙක වසරෙ හරි…..මගුල් ගෙදර තිබුනෙ වැලිගම තානායමේ…

තානායම ඉස්සරහ තමා “රේන්ද පැල” තියෙන්නේ…ඔය රේන්ද පැලේ තමා මාලු වෙන්දේසි කරන්නෙ…ගොඩක් අය මාලු ලෑලි දාගෙන මාලු විකුණන්නෙත් ඒ ළඟම තමා.. ලාල් ගෙ මාලු ලෑල්ලත් ඒ ළඟ…

ඉතිං මගුල් ගෙදර වැඩ ජයටම යනකොට…අපිට එක පාරට මාර කාලගෝට්ටියක් ඇහුණා..

මිනිස්සු කෑ ගහනවා…මොර දෙනවා…ලතෝනි දෙනවා…අපිත් පොඩ්ඩක් එලියට බැහැලා බැලුවා….

අම්මටසිරි…ලාල් මාමා මන්නයක් ලේ පිරිච්චි මන්නයක් උස්සන් හෝටලේ දොර ගාව ඉඳන් කෑ ගහල කියනවා

“කීර්ති අයියා…මුදුන් මුලයි..පිළිකාවයි මම අයින් කරලා වැඩේ දුන්නා”  කියලා

කී‍ර්ති අයියා කිව්වෙ අපේ තාත්තට…පොර අර දෙනෝදාහක් බලන් ඉද්දි අර නාගරික මන්ත්‍රීට මන්නෙන් ගහලා…මන්ත්‍රී ඔන් ද ස්පොට්…..ලාල් නිකන් එහෙම කිව්වෙ අපේ තාත්ත කොන්ත්‍රාත්තුවක් බාර දුන්න වගේ…..

කොහෙන් කොහොම හරි ඉතිං පොලීසිය ලාල්ව අල්ලන් ගියා…..මම ඉස්සර කිව්ව වගේ පොර එහෙම පොතේ පතේ දැනුම ලොකුවට තිබුන ඩයල් එකක් නෙවෙයි….ඒ වුනාට පොර හිරේ ඉන්නකොට නීති පොත් ගෙනල්ලා කියවලා…ඔක්කොම පොයින්ට් ඉගෙන ගෙන…ලෝයර් කෙනෙක් අල්ලන්නෙ නැතුව…පොරගෙ නඩුවට පොරම ඇපියර් වෙලා අවුරුදු 8කින් විතර නිදහස් වෙලා ගෙදර ආවා….ඒ අතින් බලද්දි පට්ට වැඩ්ඩෙක් තමා…..(හැබැයි මිනිහෙක් මරපු එක මම කීයටවත් සාධාරණීකරණය කරන්නෙ නෑ)

ඕක නෙවෙයි හොඳම කතාව

ඉතිං මිනිහා නිදහස් වෙලා ආව දවස්වල අපේ අම්මයි තාත්තායි ගිහින් තිබුනා පොර ව බලලා එන්න…

එතනදි අපේ අම්ම කිව්වලු

“දැන්වත් ඉතිං ලාල් නෝන කියන දෙයක් අහන් පාඩුවෙ ගෙදරට වෙලා ඉන්න”

ලාල්: “කුමාරි අක්ක මේ පිස්සු කතා කරනවා….මේ ගෑනි තමා මන්නෙ ගෙනත් දුන්නෙ කොටල දාපන් කියලා”

-නිමි-

ජීවත් වෙන්න ඕන කොහොමද ?

මේක මම පටන් ගන්නම් Beatles සංගීත කණ්ඩායමේ John Lennonට වෙච්ච සිද්දියක් කියලා….

ජෝන්ට අම්මා පොඩි කාලේ ඉඳලා උගන්වනවා “සතුට” තමා ජීවිතේ වැදගත්ම දේ කියන එක….ඉතින් එයා දවසක් ඉස්කෝලේ ගියාම ටීචර් පන්තියේ ලමයින්ට කියනවා ලොකු උනාම තමන් කරන්න ඉන්න එක ගැන ලියන්න කියලා……ජෝන් කොලේ ලියන්නේ “මට සතුටින් ඉන්න ඕන” කියලා…

ටීචර් එයා ළඟට ඇවිත් කියනවා “ජෝන් ඔයා ප්‍රශ්නේ හරියට තේරුම් අරන් නෑ”

එතකොට ජෝන් ටීචර්ට කියනවා “ටීචර් ජීවිතේ හරියට තේරුම් අරන් නෑ”

ඔතන තමා අපි ගොඩ දෙනෙක්ට වැරදුනේ…..ගොඩක් දෙනෙක් ජීවත් වෙන්නේ අනිත් අයට ඕන විදියට එයාලට පේන්න……මමත් එහෙම කාලයක් ජීවත් උනා……අපි ගොඩ දෙනෙක් බයයි අනිත් අය අපි ගැන මොනවා හිතයිද? මිනිස්සු අපිට හිනා වෙයිද?….පොර ටෝක්ස් ඉශු කරන්න ඕන නෑ…..මාත් ඉස්සර එහෙම තමා ජීවත් උනේ!!!!

එක උදාහරණයක් මම ගන්නම්!!!! මට ඉස්සර ඉඳලා තිබුන බයක් තමා අපේ තාත්තා මම ගැන ආඩම්බර වෙනවද නැද්ද කියලා?? මම ඉතින් අම්බානක ට්‍රයි කළා එක කරන්න…..පුළුවන් තරම් උත්සහා කළා තාත්තා බලාපොරොත්තු වෙන standard එකට එන්න…..එක කරන්න අමාරු උනේ අයියයි, මල්ලියි තාත්තගේ ඔලුවේ ලොකු standard එකක් දාපු එක!!! අයියා ගුවන් හමුදාවේ ගුවන් නියමුවෙක් මල්ලි දත් දොස්තර කෙනෙක්….මට ඒ standard ලොවෙත් මැච් කරන්න බෑ!!!! ඒත් මම අත ඇරියේ නෑ…..දිගටම ට්‍රයි කළා……

පස්සේ මට තේරුණා….මේක හරි යන්නේ නෑ!!!! තාත්තා කවදාවත් මම ගැන ආඩම්බර වෙන එකක් නෑ!!!! එකට මට කරන්න දෙයකුත් නෑ!!!! ඒකත් එක්කම ඔලුවට ගිය එකක් තමා තමන්ගේ කෙනෙක් හිතන විදියට මට ජීවත් වෙන්න බැරි නම් අනිත් මිනිස්සු ගැන කවර කතාද කියලා!!!

අපි ජීවත් වෙන්නේ පොඩි කාලයයි…ඒකත් අනිත් මිනිස්සු හිතන විදියට ජීවත් වෙන්න ගියොත් විනාසයි…..

අනිත් එක අපි කවුරුත් සර්ව සම්පූර්ණ මිනිස්සු නෙවෙයි….හැමෝගෙම ජීවිත 100%ක් සුදු නෑ…කළු ටිකක් ගෑවිලා තියෙනවා…..මාත් ජීවිතේ වැරදි කරලා තියෙනව මටත් ජීවිතේ පසුතැවීම් තියෙනවා…..කරපු හැම දේ ගැනම මට ආඩම්බර වෙන්නත් බෑ…….මම 100% සුදු චරිතයක් කියනවනම් මම පට්ට ගොනෙක්……

වැරදි නම් ඉතින් හදා ගන්න ඕන!!!

හැබැයි ඉතින් පසුතැවෙන එක නම් නැති කරලා දාන්න විදියක් හොයා ගන්න ඕන…..ඒක නම් ජීවිතේ පරිණත වෙද්දී ටික ටික හරි යනවා….වයස යනවා එක්ක අපි එක පාරට තීරණ ගන්න එක නවතිනවා….ටික ටික හිතල තීරණ ගන්න ගත්තම ඒක අඩු උනා….සමහර තීරණ තියෙනවා අපිට මොළේට ඉඩ දෙන්න වෙන…..සමහර තීරණ තියෙනවා හදවතට ඉඩ දෙන්න වෙන…..ඔය දෙකෙන් එකක් තෝර ගන්න උනොත් හදවතට ඉඩ දෙන්න ඕන…

තව කියන්න ඕනෑම එකක් තමා පලවෙනි පොයින්ට් එකේ අනිත් පැත්ත…..අනිත් උන්ව Judge කරන්න යන එක…..

මාව දැක්කම සමහරු හිතන්නේ මම මහා රස්තියාදුකාරයෙක්….මැරයෙක්…..කියන එක!!!! මගේ පෙනුම, Tattoos, රැවුල ඔක්කොම එකතු උනාම ඒක තමා සමාජේ රස්තියාදුකාරයෙක් කියන standard එක…..

  1. මගේ පෙනුම මට වෙනස් කරන්න බෑ….
  2. පච්ච ගැහුවා කියල මම රස්තියාදුකාරයෙක් වෙන්නෙත් නෑ….Badass වෙන්නෙත් නෑ…..හොඳ මනුස්සයෙක් වෙන්නෙත් නෑ…..tattoo කියන්නේ art එකක්…..ඒකට මම ගරු කරනවා…එච්චරයි!!! අනික tattoos වලට තේරුමක් තියෙනවා……මගේ වම් අතේ තියෙන Anchor(නැංගුරම) එකෙන් කියන්නේ Solid (ස්ථිර/ශක්තිමත්) කියන එක…දකුණු අතේ තියෙන ඇතා ගෙන් කියන්නේ intelligence and courage (බුද්ධිය හා ධයිර්ය)…මම ජීවිතේ ගත්ත අමාරු තීරණයක් මතක තියන්න මම එක ගැහුවේ

වැල් වටාරම් ගැහුවට මේකේ තියෙන සංක්ෂිප්තය මම කියන්නම්….
ජීවිතේ කොටයි
අනිත් උන්ට ඕන විදියට අපි ජීවත් වෙන්න ඕන නෑ
අනිත් උන් ජීවත් වෙන විදියත් අපිට අදාළ නැ
අදාළ වෙන්නේ අපි අනිත් උන්ට කරදරයක් වෙන්නේ නැතුව අපිට ඕන විදියට සතුටින් ජීවත් වෙන එක විතරයි!!!

කවදමහරි මට හිතෙනවා තාත්තා මම ගැන ආඩම්බර උනේ නැතත් “දෙවෙනි එකා උගේ ජීවිතේ සතුටින් ජීවත් වෙනවා කියලා” සතුටු වෙයි කියලා

ගණන් ආදරේ

සරල රේඛාවකින් යා කරපු
අපේ හිත් දෙකට
උඩින් තව එකෙක් සමාන්තර
රේඛාවක් ඇඳලා

අම්මලා කියනවා
ඒ රේඛාව හොඳයිලු
තව ඡේදන රේඛාවකුත්
ගහලා පෙන්නනවා
අනුරූප කෝණ සමානයිලු
ඒකාන්තර කෝණත් සමානයිලු

අපරාදෙ…..
සරල රේඛාව
සරල වැඩි වුනා
මට තිබුනේ
උඹව වට කරලා
රවුමක් අඳින්න

උඩඟු ලියන්

මේ සිද්දිය උනෙත් දැනට ගොඩක් දවසකට කලින්…..
ගමේ තරුණ සමිතියේ කොල්ලො ටික තීරණය කරලා ශාස්ත්‍රීය ප්‍රසංගයක් තියන්න.. උන් වැඩක් කලොත් ඒක අල

ඉස්සර හැම වෙසක් එකටම වගේ බීම දන්සැලකට කියලා සල්ලි එකතු කරනවා…දන්සල පටන් අරන් විනාඩි පහක් යන්නෙ නෑ දන්සැල ඉවරයි….උන්ම බීම හදන් උන්ම බීලා විනාඩි පහක් යන්න කලින් බඩු ඉවරයි….ලොවෙත් පිටින් එකෙක්ට බොන්න වෙන්නෙ නෑ…..

තව පාරක් වෙසක් එකට…හොල්මන් මන්දිරයක් දාලා….පිටින් ආපු කොල්ලො සෙට් එකකින් හොඳටම කෑවා උන් එක්ක ආපු කෙල්ලොන්ගෙ එහෙන් මෙහෙන් ඇල්ලුවා කියලා

හරි දැන් මේ සීන් එක බලමු….

දැන් මුං ෆුල් මොරාල් එකේ ගේමට බැහැලා වැඩේ කරන්න!!!! ස්පොන්සර්ස්ලා හොයන්න ගම වටේම මුන් ඇවිදිනවා….

“අයියෙ ටිකට එකක් ගන්නකො….මචං ඔෆිස් එකෙන් ස්පොන්සර්ශිප් එකක් අරන් දියන්කො….මල්ලි ටිකට් එකක් ගනින්කො”

පාරෙ බැහැල යන්න බෑ

කොයින් කෝමහරි මුන් සල්ලි ටිකක් සෙට් කරන්….හැබැයි හොයාගත්ත සල්ලිවලින් භාගයක් විතර ඉවරයි මුන් හැමදාම මීටින් කිය කිය හවසට සෙට් වෙලා බොනව…

දැන් ටික ටික ශෝ එකේ දවසත් ළං වෙනවා….මුන් දැන් දසඅතේ කල්පනා කරනව කොහොමද මැච් එකක් ගහන්නෙ කියලා…ඇයි ඉතිං මුන් දෙන්න හදන ගණන්වලට ලොවෙත් ඔරිජිනල් ආර්ටිස්ට් කෙනෙක් කැමති වෙන්නෙ නෑ….ඔය අස්සෙ කල්පනා කර කර ඉද්දි දුලංගයා කියලා

“මචං මම දන්න ඩයල් එකක් ඉන්නවා…පොඩි බෑන්ඩ් එකෙක සිංදු කියන…පොර කියන්නෙ නන්දා මාලිනිගෙ සිංදු විතරයි…අපි පොර දාලා ශෝ එක කරමු…පොඩි ගාණක් ගෙව්වම ඇති….අපිට තා ෆන් එකක් දාන්න පුලුවන් කියලා…

ඔක්කොම එක පයින්ම දුලංගයගෙ අදහසට කැමති උනේ තව ගාණක් ඉතුරු කරන් බොන්න පුලුවන් වෙන නිසා…. දැන් ඉතිං ඔක්කොම ෆුල් හැපී

දුලංගය අර කොල්ලට කතා කරලා මුලු ශෝ එකේම සිංදු කියන්න රුපියල් 20000ට කැමති කරවන්…දැන් උන් ෆුල් මොරාල් සල්ලි ඉතුරු නිසා….

ඊටපස්සෙ මුලු ගමේම ෆුල් පෝස්ටර් ගහලා නන්දා මාලිනි ශෝ කියලා…

ෆුල් ගැම්ම ඉතිං….නන්දා මාලිනි මැඩම් අපේ ගමට එනව කියන්නෙ…ගමේම කතා වෙන්නෙ මේක…
දැන් ශෝ එක දවසත් ආවා….

ගමේ හැමෝම වගේ හන්දියෙ පිට්ටනියෙ… සූ ගාලා සෙනග….

ඒ අස්සෙ තව බුලක්…එනවුන්ස් කරන ඩයල් එකකට එන්න කියන්න මුන්ට අමතක වෙලා.. කෝමහරි සම්තියේ “කසුන්”ව කැමති කරන් වැඩේට

ශෝ එකේ ඕපනින් එකට පොල් තෙල් පහන පත්තු කරන්න කියලා ගමේ මුදලාලි ල සෙට් එකත් එකතු කරන් එතනින් තව ගාණක් කපා ගෙන….

දැන් තමා හැමෝම පුන පුනා බලා හිටපු වෙලාව….

කසුනයා මයික් එක අරන් තටම තටම කතාව පටන් ගත්තා

“හොඳයි මිත්‍රවරුණි…ඒනම්…අපි තව කල් අරගන්නෙ නැතුව මේ වේදිකාවට ආරාධනා කරමූ ඒ අසහාය….අද්වීතීය…ළයාන්විත…මියුරු…හදට දැනෙන සොඳුරු ගීතාවලියක හිමිකම් තියෙන නන්දා මාලිනි මහත්මියගේ කටහඬින්ම ගී ගයන……. … (කියලා අර පොඩි කොල්ලව ස්ටේජ් එකට ගෙන්නුවා)

දැන් ගමේ මිනිස්සු ෆුල් අවුල් ගිහින්…ඔක්කොගෙම හෝප්ස් නැති උනා වගේ!! (මුන්ගෙන් ඉතිං මීට වඩා දෙයක් බලාපොරොත්තු වෙන්නත් බෑ)

පොර ස්ටේජ් එකට නැග්ග විතරයි භාගයක් විතර සෙනග ගෙදර ගියා….සිංදුව පටන් ගත්තා විතරයි…ඉතුරු භාගෙත් ගෙදර ගියා…

අන්තිමට ඉතුරු උනේ මායි, සමිතියේ සෙට් එකයි, සවුන්ඩ්ස් ගෙනාපු ලොරියෙ උනුයි, තව තුන් හතර දෙනෙකුයි (මාත් ගෙදර යන්නෙ නැතුව හිටියෙ කෝමත් ගෙදර ගියත් මේ කන්දොස්කිරියාවට නින්ද යන්නෙ නැති නිසා)

සමිතියේ උන්ට වගක් නෑ…උන් කුණු වෙන්න බීලා ස්ටේජ් එක ඉස්සරහ පිස්සුවෙන් වගේ නටනව…තව උන් ටිකක් බීලා වැටිලා….

කොල්ලා දෙවැනි සිංදුව පටන් ගත්තා

“අම්මාවරුණේ”

දේශානයයි, දුලංගයයි, දනුශ්කයයි ශර්ට් ගලවන් ඒ සිංදුවටත් උඩ පැන පැන නටනවා….

සවුන්ඩ්ස් ගෙනාපු ලොරියේ එකා බෙරිහන් දෙනවා අනේ බුදු මල්ලියේ බෆල් එකෙන් බැහැපන් කිය කියා

තුන්වෙනි සිංදුව….

“උඩඟු ලියන්”

දැන් කට්ටියම ෆුල් හන්තර් වෙන්න ගහලා ඉන්නෙ… ඔය සිංදුව යන වෙලාවෙ ස්ටේජ් එකේ ෆුල් ගැම්මෙන් මොරාල් එකේ නට නට හිටියේ රවීනයයි, චන්දිමයයි, තරිඳුවයි…. හෙනම ජාතිආලයෙන් නට නට හිටියා….

මටත් ටිකක් කම්මැලිකමක් ආපු නිසා මම ෆෝන් එක ඔබ ඔබ හිටියෙ…

ඒ සිංදුව ඉවර වෙනවත් එක්කම වගේ දඩාස් ගාලා සද්දයක් ආවා….ඒ එක්කම බුදුඅම්මෝඕඕඕ කියලා මර ලතෝනියකුත් ඇහුනා….මමන දඩබඩ ගාලා ස්ටේජ් එක ගාවට දිව්වා…

දෙයියනේ අර සිංදු කිය කිය හිටපු පොඩි කොල්ලා කටින්, ඔලුවෙන් ලේ පෙරාගෙන පාර මැද වැටිලා…

පොර අඬ අඬ කියනව

“ඇයි අයියෙ ඔහෙලා මාව උස්සල වීසි කලේ….සිංදු කැතයි කිව්වනම් මම සිංදුව නවත්තනව නේ…..

ඔය අස්සෙ චන්දිමයා බෙරිහන් දෙනව….
“ඉතිං ඔහේ නෙ බෙරිහන් දුන්නෙ…එමගට මා විසි කරන්න කියලා”

එතකොට තමා මට සීන් එක මීටර් උනේ….ඔය සිංදුවේ ක්ලයිමැක්ස් එකේදි කියනවා

“එමගට මා විසි කරන්න කියලා”

බීලා බීලා ෆුල් කික් එකේ හිටපු රවීනයයි, චන්දිමයයි, තරිඳුවයි සිංදුවේ ඒ කෑල්ල යද්දි මේ කොල්ලව උස්සලා ස්ටේජ් එකෙන් වීසි කරලා…

බීලා හිටපු නිසා එකෙක්ටවත් සිහියක්වත් නෑ..
මම ටග්ගාලා වීල් එකක් ගෙන්නන් අර කොල්ලව අරන් ඉස්පිරිතාලෙට ගියා….

සින්දු තුනයි….ශෝ එක ඉවරයි…..කොල්ලට ඔලුවට මැහුම් හතයි….දත් තුනක් කැඩිලා….මට වීල් එකට 800යි!

සුරන්ගෙ කාර් එක

මේ සිද්ධිය උනේ 2013දී… ටිකක් ගොං පාට් එකක් මම දාපු….ටිකක් නෙවෙයි ගොඩක් ලොකු  ගොං පාට් එකක්….

සිද්දිය වෙච්චි දවසෙ ක්ලාස් එකේ ළමයි පාටි එකක් ඕගනයිස් කරලා තිබුනා….ඉතිං ඒ ළමයි අපිටත් ඒකට ආරාධනා කරලා තිබුනා…වල්ගම “සරසි” කියලා හෝටලේක තමා මේ පාටිය තිබුනෙ…මාත් ඉතිං උදේම ලෑස්ති වෙලා පිටත් උනා….

මම ටිකක් කලින් ඇවිත් තිබුනු නිසා ලොකු තාත්තලාගේ ගෙදරත් පොඩ්ඩක් ගිහින් ඉඳලා ආයේ හෝටලේ පැත්තට එන්න ආවා..හෝටලේ තිබුනේ පාරෙන් එහා පැත්තේ….මම වාහනෙ ස්ලෝ කරලා හරියට සිග්නල් දාලා හරවනකොටම කොහේ හරි ඉඳලා ආපු බයික් එකේ හිටපු හරකෙක් මගේ සිග්නල් ලයිට් එකෙත් වද්දගෙන නවත්තන්නෙම නැතුව ගියා….

මට පට්ටම මළ….2013 කියන්නෙ ඉතිං මට වයස 26යි….හොඳටම උණ තියෙන කාලේ..

මම එහෙම්ම ආයෙ වාහනේ රිවස් එකට ගහලා මූව ෆලෝ කරන්න ගත්තා…කොහොමහරි ලයිට් ගහලා හෝන් ගහලා ඌව ඕවටේක් කරල නැවැත්තුව…

බයික් එකේ දෙන්නෙක් හිටියා…. පිටිපස්සෙ හිටපු එකා හෙන ගැම්මෙන් බයික් එකෙන් බැහැල මගෙන් “ඇයි” කියලා ඇහුවා…

ඌ එහෙම ඇහුවම මට තවත් මළ…ඇයි යකෝ වැරැද්ද කරලා තව කට ගහන් එද්දි….
මම කිව්වා

“උබ නෙවෙයි නේ එලෙව්වෙ…උබ කට වහපන්”

මගේ ටෝන් එක ටිකක් දරුණු උන නිසා ඌ ශේප් එකේ කට වහ ගත්තා…

මම ඊටපස්සෙ බයික් එක එළවපු එකාට හොඳට  දෙසා බාන්න ගත්තා…මට ශුද්ධ සිංහල වලට A+ තියෙන්නේ…වඳුරු කුණුහරුප පවා මම දන්නවා…

මූ ඊටපසේ කියනවා
“නෑ අයියෙ එතන නවත්වන්න බෑ නේ..අනික අපිට හොඳටම පරක්කු වෙලා තියෙන්නේ  අද ලක්ෂ්මන් මහත්තයා පිළි ගන්න යන්න තියෙනවා

(මට කලින් කියන්න අමතක උනා..එදා ලක්ෂ්මන් යාපා මහත්තයාට මොකක් හරි ඇමතිකමක් ලැබිලා පළවෙනි පාරට මාතරට එන දවස….ඉතිං එයාව පිළිගන්න අම්බානක උත්සව සංවිධානය කරලා මාතර)

අරූ ඔය විස්තරේ කිය කිය ඉද්දි තව බයික් එකක් ඇවිත් නැවැත්තුව…උන්ගෙ සෙට් එකේ… දැන් උන්ගෙ හතරයි…මම තනියම…
(ළාවට ශර්ට් එක අස්සෙන් හීනියට දාඩිය දාන්න ගත්තත් මම බය පෙන්නන්න ගියේ නෑ…. 
මොකද ඔය ඒරියා එකේ ඉස්කෝලෙ යාලුවො අම්බානක හිටිය….

ඔය අස්සෙ අර පස්සෙ බයික් එකේ හිටපු එකෙක් තව කාටහරි කෝල් එකක් අරන් කියනවා
“මචං පොඩ්ඩක් හරවන් වරෙන් සුසිදුට පොඩි කරදරයක්”

දැනටමත් හතරක් ඉන්න එකේ තව සෙට් එකක් ආවොත් රජ කෑමක් සෙට් වෙයි කියලා හිතත් කියන්න ගත්තා….

ඒ කෝල් එක ගත්ත එකා…. කෝල් එකේ ඉන්න ගමන් මගෙන් ඇහුවා
“අයියෙ මේ හරියට කියන්නෙ මොකක්ද?
(ඒරියා එක මොකක්ද)

අම්මටසිරි ඒක අහපු ගමන් මගේ බය කොහෙන් ගියාද දන්නෙ නෑ….මුන් මේ පැත්තේ උන් නෙවෙයි කියලා තේරුනාම බෝලේ මගේ පැත්තට ආයෙ ආවා…දැන් ආයේ මම රජා වගේ
(ඕක තමා මනුස්ස ස්ව්භාවෙ)

ඔය අස්සෙ තව එකෙක් මට කියාගෙන ආවා
“අපි කුලවීර ඇමතිගෙ මිනිස්සු” කියලා

මට ඒක කිව්වම තව ඌරුජුවල්….(කුලවීර කියන්නෙ ඇමති කෙනෙක් නෙවෙයි…වැලිගම ප්‍රාදේශීය සභාපති…අපේ තාත්තගෙ යාලුවෙක්)

මම ඒක කියපු එකාට කිව්වා “කුලවීර කොහෙන්ද *&$% ඇමති කෙනෙක් උනේ”

මුන් එතකොට තව ඇඹරෙන්න ගත්තා…මුන් හිතුවා මම හෙන පොරක් වෙන්න ඇති එහෙම කතා කරන්න කියලා…මට ඉතිං හෙනම ආතල්

(දැන් තමා තේරෙන්නෙ මම කලේ ගොං වැඩක් කියලා…ඒ දවස් නේ ඉතිං…තරුණ කාලෙනෙ)

ඊටපස්සෙ පොරම ආයෙ කියනව..

“නෑ නෑ අයියෙ…අද ලක්ෂ්මන් මහත්තයා දිවුරුම් දෙනවනේ අපි එයාව පිළිගන්න යන්නෙ කියලා….

මට මළ වැඩි උනේ මුන් උන්ගෙන් උන වැරැද්ද ගැන කතා නොකර පොර ටෝක්ස් දීපු නිසා….

උන් එහෙම කිව්වම මම කිව්වා
“ලක්ෂ්මන් යාපාට කියපන් මේක සුරන්ගෙ කාර් එක” කියල

උන්ට දැන් රෙවෙන්න වගේ…උන්ගෙ මූණුවලින් ඒක හොඳට පේනවා…බයවෙලා…උන් හිතන්න ඇති යකෝ මූ මාර පොරක්..ඇමතිතුමාවත් හොඳට දන්නව ඇති මේම කතා කරන්න කියලා

මටත් ඉතිං ඒ වෙලාවෙ මගේ ඇඩ් එක දාගත්ත නිසා හිතේ පොඩි කික් එකක් තිබුනා..

අයියෙ අයියට අලුත් ලයිට් එකක් දාන්න කීයක් යාවිද කියල එකෙක් ඇහුව….

“මට තමුසෙලාගෙ සල්ලි ඕන නෑ ඕයි” කියලා අන්තිම පොර ටෝක් එකත් මම ඉශූ කරලා කාර් එක හරවන් හෝටලේට ගියා….

අන්තිමට දීපු පොර ටෝක්ස් ටිකත් #කේ ගහන්….අතින් 18000ක් දීලා ලයිට් එක හදා ගත්තා….

උන් වැරැද්ද පිළි අරන් හොඳට කතා කලා නම් මෙහෙම නොවෙන්න තිබුනා….

ඒක නෙවෙයි හොඳම සිද්දිය….උන් එදා ගිහින්  ලක්ෂ්මන් මහත්තයාට සීන් එක කිව්වනම් පොර අද වෙනකම් කල්පනා කරනව ඇති “කව්ද යකෝ සුරන්” කියන්නෙ කියලා 

පිරමීඩ

මේක ටිකක් ලොකු හෑල්ලක්.. ඒ වුනාට මේ දවස්වල වෙන දේවල් වල හැටියට මේක දාන්නම හිතුනා

මේ වගේ දේවල් වෙලා නැද්ද?

අවුරුදු පන්සීයකින් විතරක්වත් අපි උන්නද මළාද බලපු නැති උන්

“මචන් ගොඩ යන්න නියම විදියක් තියෙනවා…..මමත් ළගදි පටන් ගත්තේ….මම දැන් හොඳ ගාණක් හොයා ගත්තා…. උබ ඒ දවස්වල ඉඳන් නියම පොරක් නිසා උබට විතරමයි කියන්නෙ…..මේක අපේ රටේ විතරක් නෙවෙයි තියෙන්නෙ….. බිල් ගේට්ස් ගොඩ ගිහින් තියෙන්නෙත් මේකෙන්…..අපේ සර් එහෙම හොරෙක් නෙවෙයි බං…..උබ මම කියනවට මේකට වරෙන්…….ලොකු කම්පැනිවල ලොක්කො ඔක්කොම මේකෙ ඉන්නව බං……උබ මම කියනවට ඇවිත් බලපන්…….නිකන් ඉඳන් සල්ලි බං….කැම්පස් කොල්ලොත් ගොඩක් දැන් මේක කරන්නෙ….අපේ එකෙක් ගොඩ යනවා කියන්නෙ මටත් සතුටුයි…මම මේ උබට තියෙන ෆිට් එකට කියන්නෙ….උබ ඔය මිස් කරගන්න හදන්නෙ ලයිෆ් ටයිම් ඔපචුනිටි එකක්….මේකේ සල්ලි හම්බ කරන්න මහන්සි වෙන්න ඕන නෑ බං…ඊසි මනී!!!!!!!

ඕවා ඇහිලා තියෙනවනම් උන් වාතයක් වෙලා තියෙනවා නම් උන්ගෙන් අනිවාර්යයෙන් පරිස්සම් වෙන්න……

අපේ පොඩි උන්ගෙ මොළ හෝදලා විසබීජයක් දාන එක මහා අමාරු වැඩක් නෙවෙයි….ඒක පට්ට ලේසි වැඩක්…මම ඒකට අහු වෙන උන්ට වැරැද්දක් කියන්නෙ නෑ….ගොඩක් උන් ජීවත් වෙන්නෙ full stress and tension එකේ….උන්ට ලොකු හීනයක් පෙන්නලා ලස්සන හීනයක් විකුණලා මේකට ඇදලා ගන්න පට්ට ලේසියි…..ඉතිං ගොඩක් උන් මේකට නිකන්ම අහුවෙනවා…

කාලෙන් කාලෙට මුන් එක එක fancy නම් දාගෙන මේවා පටන් ගන්නව pyramid selling, multi level marketing, network marketing……ඔක්කොම එකයි…..හැබැයි Ponzi scheme කියන්නේ වෙන එකක්….ඒක අපි පස්සේ කතා කරමු

කොහොමද මේවා වැඩ කරන්නෙ…..

හිතන්න මම අලුතෙන් කම්පැනි එකක් පටන් ගන්නවා ඉලෙක්ට්‍රොනික් ගැජට් විකුණන්න…ඊට පස්සේ මම කරන්නේ Products ටිකක් එකතු කරලා පොඩි බන්ඩ්ල් (Bundle) එකක් හදනවා (ලැප්ටොප් එකයි, ෆෝන් එකයි,හොඳ අත් ඔරලෝසුවයි)…මේ තුනම මට හොඳ Profit එකක් තියාගෙන ලක්ෂ එකහමාරකට විකුනන්න පුළුවන් (150,000)…..ඊට පස්සේ මම කරන්නේ හොඳ මාකටින් කැම්පේන් එකක් පටන් ගන්නවා….මොළ හෝදන….

“නිකන් ඉඳන් සල්ලි හම්බකරන්න කැමතිද කියලා”

ඕක දැකපු ගමන් ගොඩක් පොඩි උන් මේකට ජොයින් වෙන්න අහනවා……හිතන්න මට 10ක් සෙට් උනා කියල….මම උන්ට කියනවා මගේ මේ products ටික දෙනවා ලක්ෂ දෙකහමාරකට (250,000) මට එතැනින්ම ලක්ෂයක් වාසියි…. මේ බන්ඩ්ල් එකේ තියෙන බඩු වලට පොඩි උන් කැමතියි….ගොඩක් කැමැත්තෙන් ගන්න හිතන් ඉන්න ගැජට්..උන් නිකන්ම ඒවා ටික දැක්කම කැමති වෙනවා

හරි…දැන් ඔලුවට එන ප්‍රශ්නේ ඇයි උන් වැඩි ගානක් දීලා මේක ගන්නේ කියල නේ?

  1. උන් දන්නෙ නෑ මම විකුණන්නෙ වැඩි මිළට කියලා
  2. මම උන්ට කියනවා ඒ එක එකාට තව හතර දෙනෙක් එක්කන් එන්න (එක්කෙනෙක් හතර දෙනෙක්)…අලුතෙන් එන උන්ට මගේ මේ බාස්කට් එක (බඩු ටික) Promote කරන්න….. උන් ගන්න හැම එකටම මම 10% කොමිෂන් එකක් දෙනවා….

අම්ම්ටසිරි පොඩි උන්ට මාර හැපී…..උන් හිතෙන් ගණන් හදලා බලනවා (යකෝ හතර දෙනෙක් එක්කන් ආවොත් මට ලක්ෂයක් ලැබෙනවා නේ = 250,000* 10% * 4) එක මාර මැගී නුඩ්ල්ස් (Instant) රිටර්න් එකක්….ඉතින් උන් බොක්කෙන්ම බහිනවා ගේමට……ඉතින් උන් කොහොමහරි 40ක් සෙට් කරන එනවා

කොහොම ගියත් මම ගොඩ….මගේ සේල් එක කොහොමත් වැඩි වෙනවා…අනික මම විකුනන්නේ නෝමල් මිලටත් වඩා වැඩියෙන්…..

දැන් ඉතින් මට තියෙන්නේ අලුතෙන් ආපු 40 මොළ හෝදන එක……මේ 40 දෙනාගේ මොළ හෝදන එක එච්චරම අමාරු නෑ…මොකද උන්ව සෙට් කරපු යාළුවො දහදෙනා මුන්ගේ ඔලුව හෝදලා ඉවරයි….ඉතින් මගේ වැඩේ තවත් ලේසියි….දැන් උන් 40 දෙනාත් මගේ බඩු ටික ගන්නවා…මම තව ගොඩ

මට කරන්න තියෙන්නේ අලුතෙන් ආපු උනාට එකාට තව හතර දෙනෙක් එක්කන් එන්න උන්ට මේක වාසියි කියල ඔලුවට දාන එක විතරයි……

උනුත් කොහොමහරි තව 160 දෙනෙක්ගේ ඔලු හෝදලා මට තව අලුතෙන් බිස්නස් 160ක් එනවා……මෙව්වනේ බොලේ බිස්නස්…..මම ගොඩ

හරි දැන් ඔලුවට එන ඊළඟ ප්‍රශ්නේ මුලින්ම සෙට් උන 10 දෙනාට මොකක්ද තියෙන රිටර්න් එක කියල නේ?

අලුතෙන් එන ගේන බිස්නස් එකට උන්ට තාම කොමිෂන් එක ලැබෙනවා…හැබැයි මේ පිරමිඩ් එක ලොකු වෙන්න ලොකු වෙන්න උන්ට ලැබෙන කොමිෂන් එක අඩු වෙනවා
පලවෙනි රවුන්ඩ් (Round) එකේ උන් ගෙනාපු බිස්නස් වලට උන්ට 100,000 කොමිෂන් ආව….ඊලග රවුන්ඩ් එකේ එන්නේ 40,000……ඊට පස්සේ රවුන්ඩ් ඕක තව අඩු වෙනවා

ඇයි මේකට පිරමිඩ් කියන්නේ???

බලන්න මේක පටන් ගත්තේ මම….ඊට පස්සේ තව 10ක් සෙට් උනා….උන් තව 40ක් ගෙනාව….ඒ 40දෙනා තව 160ක් ගෙනාවා….පිරමිඩ් එකේ ශේප් එක තියෙන්නේ
හිතන්න අලුත් සාමාජිකයෝ එන හැටි

10 X 4 = 40
40 X 4 = 160
160 X 4= 640
640 X 4 = 2560
2560 X 4 = 10240
10240 X 4 = 40960

කොහොමද ඉතින් මුන් Survive වෙන්නේ???? Rounds 13-14 යද්දී ලෝකේ ජනගහනයත් ඉවරයි

හැබැයි මම ඕක උන්ට කියල (කොමිෂන් එක අඩු වෙනවා) මගේ බිස්නස් එක අල කරගන්නේ නෑ…උන්ගේ ඔලුවට මම දාන්නේ මේක ලොකු වෙන්න ලොකු වෙන්න වාසි ඔයාලට තමා කියලා…….

කොහෙන් කොහොමහරි ජොයින් වෙච්ච මුල් සෙට් එකට එයාලගේ Cost එක ශේප් එකේ Cover කර ගන්න පුලුවන් උනත් අන්තිමට සෙට් වෙන ගොඩක් උන් නන්නත්තාරයි……

ගොඩක් උන් දන්නේ නෑ උන් ඇන්දුනා කියලා….ඉතින් උන් කට පියන් ඉන්නවා….සමහරු තියෙන යාලු ෆිට් එකට කට පියන් ඉන්නවා….ඔන්න ඕක තමා කෙස් එක…..

හරි…ඊළගට අපි බලමු කොහොමද මෙහෙම ජල්තර සීන් එකක් අඳුර ගන්නේ කියලා

  1. එන්න දැන්ම අපිත් එක්ක සම්බන්ද වෙලා ගෙදර ඉඳන් නිකන් සල්ලි හම්බ කරන්න
  2. ජීවිතේටම නොලැබෙන වාසියක් ගන්නේ කොහොමද
  3. ලේසියෙන් පෝසත් වෙන්න කැමතිද
  4. ජීවිතේ වෙනස් කරන ආදායමක් ලබා ගන්න කැමතිද?

ඔන්න ඔය වගේ එකක් දැක්කොත් අනිවාර්යෙන්ම ඕක බොරුවක්….හම්බෙන ඉටි ගෙඩියක් නැ…අන්තිමට ලඟින් හිටපු යාලුවොත් නැ……

ඊළගට……

යාලුවෙක් මේක Promote කරන් ආවොත් අපි මොකක්ද කරන්න ඕන?

ඒක බලන්න ඔහොම මෙහෙමයි…..

  1. ගොඩ කාලෙකින් අපිට කතා කරපු නැති එකෙක් නම් වැඩේ ලේසි…..ඉස්සෙලම කියන්න මම කැමති නෑ මචන් කියලා…..ඔව් මම දන්නවා පොර එතනින් නවතින්නේ නැ….ගොඩ කාලෙකින් කතා කලේ උගේ වාසියට, නැතුවට අපිට තියෙන ආදරේට නෙවෙයි….ඉතින් ඌව කෙලින්ම බ්ලොක් (Block) කරලා දාන්න
  2. ළඟ ඉන්න හොඳ යාලුවෙක් වාතයක් උනොත් කියන්න තියෙන්නේ…. “මචන් උබ දැන් ඕකෙන් හොඳ ගානක් හොයාගෙන නේ තියෙන්නේ…මට පොඩි සල්ලි හදිස්සියක් තියෙනවා….පොඩි අතමාරුවක් කර ගමුද….උබ ගාව සල්ලි තියෙනව නේ පොඩි ලෝන් එකක් දීපන් කියන්න……. ඕකා ආයෙත් ලොවෙත් එන්න කියන්නේ නැ….වදෙන් බේරුනා කියල Confirm කරගන්න ඕන නම් පොරට ආයේ කෝල් එකක් දීලා සල්ලි ඉල්ලන්න….වැඩේ ඉවරයි

මම ඉස්සෙල්ල කිව්වා වගේ Ponzi Scheme කියන්නෙත් මේ වගේ ජල්තර සීන් එකක් තමයි….හැබැයි මීට වැඩ ටිකක් වෙනස්..ඒක පස්සේ කියල දෙන්නම්

අන්තිමට මට මතක් උනා සර් ඒබ්‍රහම් ලින්කන් එයාගේ පුතාගෙ මුල් ගුරුතුමාට ලියපු ලියුමේ පොඩි කෑල්ලක්

“It will take time, I know, but teach him, if you can, that a dollar earned is of far more value than five found…”

මම මේක අපිට හරියන විදියට පරිවර්තනය කරන්නම්

“මම දන්නවා….මේකට කාලයක් යාවි….ඒ වුනාට මගේ පුතාට කියල දෙන්න අමාරුවෙන් හම්බ කරන රුපියල අම්බානක වටිනවා කියල නිකන් හම්බවෙන රුපියල් පහකට වැඩිය”

මේක තමා අපේ අම්මල තාත්තල අපිට පොඩි කාලේ ඉඳන් උගන්වන්නේ…එක නිසා ටිකක් ඔලුව කල්පනා කරලා වැඩ කරන්න පුරුදු වෙන්න

If it seems too good be true, it probably is……..❤️❤️❤️

EASY COME, EASY GO ❤

පෝය දවස….

ඉස්සර පොඩි දවස්වල පෝය දවස කියන්නෙ ඉස්කෝලෙ නිවාඩුවක්….ඉස්කෝලෙන් නිවාඩුවක් ලැබුනා කියන්නෙ මාරම ආතල් එකක්….ඒ වුනාට ඒ ආතල් එක කුඩු වෙන්න හේතු දෙකක් තිබුනා….

1. අම්මා පෝයට සිල් ගන්න එක :

මෙහෙම කියන එක හරි නෑ….ඒ වුනාට අම්මා සිල් ගත්තම ගෙදර මාරම පාළුයි…..කිසිම ගතියක් නෑ ගෙදර, මොන මගුලකට නිවාඩුවක් ලැබුනද කියල හිතෙන්නෙ ඒ වෙලාවට

2. ටීවී එකේ බලන්න මුකුත්ම නැති එක :
දැන් වගේ නෙවෙයි…ඉස්සර ටීවී චැනල් ගොඩක් නෑ….ඉන්ටනෙටුත් නෑ…..ටීවී එකේ හැම චැනල් එකකම යන්නෙ බණ වැඩසටහන් (මම දන්නව මම මෙහෙම කියන එක වැරදියි හෙනම පව්කාර අදහසක් කියල)

ඒ දවස්වල පෝය කියලා ආසවෙන් හිටියෙ අම්මටයි ආච්චිඅම්මටයි පන්සලට දානෙ අරන් යන එක….(ආස හිතුනෙ පන්සල් ගිහින් බුදුන් වඳින එකට නෙවෙයි අම්මව දකින්න ලැබෙන එකට)

ටික ටික ලොකු වෙද්දි පෝය නිවාඩුවට මාර විදියටම ආදරෙ කලා…ඒ කලෙත් බණ දහම් කරන්න නෙවෙයි.( ඒ වෙද්දිත් මට්ටු වෙලා නෑ….සසර කෙටි කරන් යන තැනකට දෙයක් කරන්න ඕන කියලා හිතෙන්න ගත්තෙ නෑ….ඒක මගේ පවුකාර ගතිය වෙන්න ඇති)….මේ මම කියන්නෙ කැම්පස් කාලෙ,ජොබ් පටන් ගත්ත මුල් කාලෙ….ඒ දවස්වල පෝය නිවාඩුව කියන්නෙ යාලුවො හම්බ වෙන්න තියෙන දවස…..මාසයක් වැඩ කරල කරලා ස්ට්‍රෙස් එක නැති කරන්න යාලුවො හම්බවෙන දවස……

ඒ කාලෙත් දැන් ගෙවිලා ගිහින්….දැන් පෝය එනකම් නොඉවසිල්ලෙන් ඉන්නෙ ගෙදරට වෙලා මුකුත්ම නොකර පොඩි රෙස්ට් එකක් ගන්න….යාලුවො හම්බවෙන්නවත් එලියට බහින්න හිතෙන්නෙ නෑ….( ඔව් තාම හැදිලා නෑ…පව්කාරයෙක්ම තමා…පෝයට නිවාඩු දෙන්නෙ ඕකට නෙවෙයි නෙ)

කාලෙන් කාලෙට පෝය ගැන මට හිතෙන දේවල් වෙනස් වුනාට නොවෙනස් වෙච්ච දේවල් දෙකකුත් තියෙනව…

1. අම්මා සිල් ගන්න එක….( අම්ම ගැන මට මාර සතුටුයි….අම්මා ජීවිතේ අවබෝධ කරන් වැඩ කරන එක) ඒ වුනාට පෝය දවසේ අම්මා නෑ කියන එක මාර පාලුයි

2. ඒ දවස්වල ඉඳන් හැමතිස්සෙම ප්‍රාර්ථනා කරන්නෙ පෝය දවස සතියේ දවසකට වැටෙන්න කියන එක……

මෙහෙම හිතන මට නිවන අම්බානක දුරයි…මම ඒක දන්නවා…ඒත් පවට පින දෙන්න බෑ නෙ..මේ මගේ ලැබීම….ඒක නිසා මම කියන්නෙ හදිසියෙන් වත් මම එක පාරට මැරුණොත් “නිවන් සුව ලැබේවා” කියලා පෝස්ටර් ගහන්න එපා…මට ඒක දැන්ම හම්බවෙන එකක් නෑ….ඒක නිසා පෝස්ටර් ගහනව නම් ගහන්න “සසරෙ දුක් අවබෝධ වේවා” කියලා

අපි හිතන විදිය හරිද???

මිනිස්සු හිතන විදිය හරි වෙනස්..ඒක අපි හැමෝම දන්නවා…ඒකෙනුත් ලංකාවෙ මිනිස්සු හිතන විදිය පට්‍ටම වෙනස්..ඒ ගැන මම අමුතුවෙන් කියන්න ඕන නෑ නෙ….

කැම්පස් එකෙන් අවුට් වෙලා මගේ දෙවෙනි ජොබ් එක කරන්න මම මගේ උපන් ගමට ආවා…මාතරට…ඒ ජොබ් එක තෝර ගත්තෙත් මම ගෙදර ඉඳන් යන්න පුලුවන් නිසාත් සහ ඒ ඔෆර් එකත් හොඳ නිසා…

මේ සිද්දිය උනේ මම ඔෆිස් එකට ගිය මුල් දවස්වල…. මම වැඩ ඕෆ් වෙලා කාර් එකේ ගෙදර එන්න පිටත් උනා…. ටික දුරක් ඉස්සරහට ඩ්‍රයිව් කරන් යද්දි මම දැක්ක පොල්හේන හංදියේ බස් හෝල්ට් එකේ මගේ පොඩි කාලෙ ගමේ යාලුවෙක් ඉන්නව..

මට ඉස්කෝලේ යාලුවො අම්බානකා හිටියට ගමේ වැඩිය යාලුවො හිටියෙ නෑ… අපේ ආච්චිඅම්මා කැමති උනේ නෑ අපි ගමේ අයව ආස්‍රය කරනවට (ඔව් තවත් හිතන විදිය ගැන උදාහරණයක්)

ඉතිං මම කාර් එක නවත්තල පොරව නග්ග ගත්තා…..

අම්බෝ සුරා…..ඔහෙව දැක්ක කල්…..දකින්නත් ආසයි බොලේ…..මම දැන් පොල්හේන හෝටලෙක වැඩ….ජොබ් එක නියමයි…මගේ පඩියත් හොඳයි.මට මෙච්චරක් හම්බවෙනවා…ගමේ උන් එක්ක බලද්දි මගෙ ජොබ් එක සුපිරි…උබ දන්නවනෙ උන් ඔක්කොම ටැංකි යන්නෙ (මාලු අල්ලන්න)….මේක ඉතින් චොර ජොබක් නෙවෙයි….මම ඩිප්ලෝමා එකක් පටන් ගත්තා…වීල් එකක් ගන්න ඉන්නෙ බං…සුපිරි එකක් ගන්නවා…

කොහොමද මචන් ජීවිතේ උබ හොඳට ඉන්නවද කියලවත් අහන්න පොරට මතකයක් නෑ…..අපි දෙන්න හම්බවෙන්න ඇත්තෙ අවුරුදු 7ට විතර පස්සෙ…..ආගිය තොරතුරු කතා කරන්න පොරට ඕන උනේ නෑ…..

පොරට මම දැක්කම පොඩි ඉන්සිකියුරිටි එකක් ආවද නැත්නම් ඒක පොරගෙ හැටිද කියලා මම කල්පනා කරද්දි පොර එක පාරට මගෙන් ප්‍රශ්නයක් ඇහුවා…

“කාගෙද බං කාර් එක….තාත්තගෙ එකද මේ…..”

මම – නෑ බං…මම ගත්තා….

ලීසිං ද? දැන් ෆුල් ලීසිං තියෙනව නේ? ඕන එකෙක්ට ගන්න පුලුවන්……

බොරු කියන්න ඕන නෑ…මට ඒකට හිත යටින් ටිකක් දුක හිතුනා….මම මුකුත්ම කියන්න ගියේ නෑ….

ඊටපස්සෙ පොර ආයෙත්..

කොහෙද බං වැඩ කරන්නෙ? ජොබ් එකක් තියෙනවද?

මම-ඔව් බං…මම වෙයාවෙල් ගාමන්ට් එකේ වැඩ

පොර- උබට පිස්සුද යකෝ ඔච්චර ඉගෙන ගෙන ගාමන්ට් එකක වැඩට යන්න…උබට අඩුම ගානෙ 20000ක්වත් පඩි හම්බවෙනවද? අපරාදෙ බං ඉගෙන ගත්ත ඒවා…මම උබට හොටෙල් එකෙන් ජොබක් සෙට් කරන්නද?

මට ඒ වෙලාවෙ නම් මළම පැන්නා…20000න් මගේ පෙට්‍රල් අලවන්ස් එක කවර් වෙන්නෙත් නෑ….ඒ වෙලාවෙ මට අම්බානක තරහ ගියත් දැන් ඒක මතක් කරල බලද්දි තමා මිනිස්සුන්ගෙ හැසිරීම් තේරෙන්නෙ…..

ඇයි පොරට ඉස්සර අපි ක්‍රිකට් ගහපු හැටි කතා කරන්න බැරි උනේ? ඇයි පොරට දහම් පාසලේ අපි කරපු පිස්සු වැඩ ගැන කතා කරන්න බැරි උනේ? ඇයි පොර ගමේ අනිත් උන් ඔක්කොම මාලුකාරයො මම විතරයි හොටෙල් එකේ රෙස්පෙක්ටබල් ජොබ් එකක් කරන්නෙ කියලා කියන්න හිතුනෙ? ඇයි මම ගාමන්ට් එකේ වැඩ කරද්දී ඒක චොර ජොබක් කියලා කිව්වෙ?

ඒ දවස්වල මට ඕවට උත්තර හොයන්න බැරි උනා…පොර දැක්කත් මට තරහ යනවා…බස් හෝල්ට් එකේ හිටියත් මම දැක්කෙ නෑ වගේ යනවා…නැත්නම් පොඩ්ඩක් වෙලාව පහු වෙලා යනවා…. ඒ දවස්වල ඉතිං මගෙත් ගොංකම…දැන් තමා ඒකත් තේරෙන්නෙ…..අපරාදෙ මම තරහ ගත්තෙ….ඒ පරිණත බවත් වයස එක්කම එන්න ඇති…ඒත් දැන් ඕකත් වෙලා අවුරුදු 10ට කිට්ටුයි….

මේ වගේ සිද්දි අපි ගොඩ දෙනෙක්ගේ ජීවිත වල වෙලා තියෙනව….අපිව පහත් කරලා දෙකේ කොලේට දාලා පොරවල් වෙන්න හදන ගොඩක් මිනිස්සු හිත යටින් බයයි අපිට…. ඉරිසියයි අපි ජීවිතේ ළඟා කරගත්ත දේවල් වලට….උන්ට ඕන කොහොමහරි අපිව රිද්දලා පොඩි ලල් එකක් ගන්න….අපිට නැති දෙයක් උන්ට තියෙනව කියලා පෙන්නන්න…..ඒක තමා මනුස්ස ස්වභාවෙ…… ඒ වෙලාවට උන්ගෙ ආතල් එක ගන්න දෙන්න….ඒකත් පිනක්…අනුකම්පා කරන්න…මුලදි ටිකක් අමාරු වේවි….අම්බානක මල පනීවි…..ඒත් ඒක හුරු කරගන්න බලන්න….ඒක පට්ට

මාලක

මම මාලකව අඳුර ගත්තෙ විස්ඩම් එකේ ලෙක්චරින් වලට ගියාම….අපි දෙන්නම එකම පැනල් එකේ….පොර උගන්වන්නේ P2 මම උගන්වන්නෙ F1

අපි දෙන්න අම්බානක ෆිට් උනේ MBA ක්ලාස් එක නිසා….

ජැන්ඩියට ඇඳලා ෆුල් ස්මාට් එකට තමා පොර බහින්නෙ….හෙමින් ගමනක් ඇත්තෙම නෑ…ෆුල්ම ෆුල් ඇක්ටිව් චරිතයක්….කොයි වෙලාවෙ බැලුවත් හිනා වෙලාම ඉන්නෙ..ලේසියෙන් මල පනින්නෙ නෑ….හැබැයි මල පැන්නොත් විනාසයි….

පොරගෙන් මම ජීවිතේට අම්බානක දේවල් ඉගෙන ගත්තා

අපිට ජීවිත් වෙන්න ඕන “ප්‍රැක්ටිකල් තියරි” අහගන්න නම් සුපිරිම පොර තමා මාලක….. තෙල් බෙහෙත් පොරවල් පරාදයි

1. තැනේ හැටියට ඇනේ ගහන තියරි

2.ශේප් න්‍යාය

3. හැමෝම සතුටින් තියෙන තියරිය

4. අහක යන නයි රෙද්ද අස්සෙ නොදා ගෙන වැඩ කරන විදිය

5. දීමෙන් සැනසීමේ තියරිය

6. ප්‍රැක්ටිකල් මාකටින් තියරිය

ඔය ඔක්කොම දේවල් පොර ප්‍රගුණ කරලා තියෙන්නෙ….

පොරගේ ජීවිතේ මාර සිම්පල් තියරි ටිකක් තියෙන්නෙ….කවදාවත්  වෙන එකෙක් කපන් ඉස්සරහට යන චරිතයක් නෙවෙයි…තව එකෙක්ට තැනක් දීලා උන් එක්කම ඉස්සරහට යන චරිතයක්…..මාලක දිහා බලද්දි අපේ කැම්පස් එකේ කැන්ටින් එකේ ගහල තිබුන එකක් මතක් උනා….

“අප මිනිසුන් තැනිය යුත්තෙ අප සමග යෑමට නොව අප පසු කර යෑමටය”

අලුතෙන් එන එකෙක්ට තැනක් දෙන්න ගොඩක බය වෙන උන් අස්සෙ මාලකය කලේ අලුතෙන් එන උන්ට චාන්ස් දීලා උන්ව හදල ගත්ත එක…එහෙම උන් මේ දවස්වල පට්ට අඩුයි…

ජීවිතේ අපිට හැම තිස්සෙම චාන්ස් ලැබෙන්නෙ නෑ…එන චාන්ස් එක අරන් ඒක අපිට ඕන විදියට වෙනස් කරන්න ඕන කියල පොර මට ඉගැන්නුවා…..

ඉස්සෙල්ලා මම කිව්ව වගේ පොරගෙ තියරි හෙන සිම්පල්….පොර කියලා දීපු තව පාඩමක් පොරගෙ වචනෙන්ම මම කියන්නම්….

“උබට ඔය බොක්ක දීගෙන උබ එක්ක ඉන්නව වගේ පෙන්නුවට එකෙක්වත් උබ ගාව ඉන්නෙ උබට තියෙන ආදරේට නෙවෙයි…උබ උබේ වැඩේ කරපන්…එච්චරයි…කොටින්ම කියනවනම් උබ මාවවත් විශ්වාස කරන්න එපා…උබට උබ විතරයි…..අන්න ඒක ඔලුවෙ තියන් වැඩ කරපන්”

දොඩන් ගොඩම බදාගෙන වැඩ කරන චරිතයක් නෙවෙයි මාලක කියන්නෙ…පොරගේ ජීවිතේ ෆස්ට් ප්‍රයෝරිටි එක තමා පවුල් ජීවිතේ….

ගොඩක් උන්ගෙ ෆස්ට් ප්‍රයෝරිටි එක වෙන්නෙ ජොබ් එක..වෙලාවක් තිබුනොත් තමා පවුල් ජීවිතේ ගැන බලන්නෙ…ඒ වුනාට පොර එහෙම නෙවෙයි….කොටින්ම කියනවනම් පොර ලෙක්චරින් කරන්නෙත් පවුල ගැන හිතලා (සල්ලි ගැන හිතල නෙවෙයි) දවසක් පොර මට මෙහෙම කිව්වා

“සුරා…මට කලම්බු කැම්පස් එකේ ඩිග්‍රියක් තියෙනවා, නෝතැම්ප්ටන් එකේ එම්බීඒ එකක් තියෙනවා, සිමා එකේ මම ඇසෝසියෙට් මෙම්බර්, සිම් එකෙත් ඇසෝසියෙට් මෙම්බර්….ඒ උනාට මගේ බිස්නස් එක නිසා මම නිකන් මුදලාලි කෙනෙක්. (මට කියන්න අමතක උනා…පොර තමා සිංහ ෆර්නිචර් එකේ CEO) ලෙක්චරින් කරන එකෙන් මට මාර ගැම්මක් තියෙනවා ….මම කැමති නෑ සුරා  මුදලාලි වෙන්න….පොඩි උන් තුන් දෙනා උනත් කැමති මගේ තාත්තා ලෙක්චරර් කෙනෙක් කියන එකට…උන් ටිකක් තේරෙන වයසට ආවාම මම මේක නවත්වනව කොහොමත්……
කවදාවත් වැරදි කතාවක් හැදිලා නෑ මාලකගෙ කැරියර් එකේ…ඒ පොර හැමදාම පවුලට ෆස්ට් ප්‍රයෝරිටි එක දීපු නිසා….

මුලටම දකින එකෙක් හිතන්නෙ…මුගෙ නම් %& ඇඩ් එක කියලා…හැබැයි ආස්‍රය කරන්න ගත්තම තමා උන්ට තේරෙන්නෙ මූ එලම පොරක් කියලා…..

අපි කොහොමද අපිවම මාකට් කරගන්නෙ කියන ප්‍රශ්නෙට උත්තරේ දෙන්න නියම කෙනා තමා මාලක

“සුරා මේ…. වැඩේ කරන එක එකක්….කරපු වැඩේ මාකට් කරන එක එකක්…පඩයක් ගියත්  මාකට් කරන්න අපි දැන ගන්න ඕන”
 
ඉස්සෙල්ලා කිව්ව වගේ දොඩන් ගොඩම බදා ගන්නෙ නෑ අනික දන්නෙ නැති දේවල් කරන්න යන්නෙත් නෑ….මට මතකයි මම දවසක් මොකක්හරි බිස්නස් එකක් ගැන කීවම පොර කිව්වා..
“අනේ මේ ඔය දන්නෙ නැති ලබ්බවල් මම කරන්නෙ නෑ”
මාලකය දෙයක් කරත් කරන්නෙ හොඳට හිතලා….
පොර ළඟදී නියම විලා එකක් දැම්මා..මරු කන්සෙප්ට් එක.කියන්න දෙයක් නෑ…නියමෙටම වැඩේ කරල තියෙනවා….මම දන්න තරමින් අම්බානක ස්ටඩී කරලා තමා වැඩේට අත ගැහුවෙ.(හිතටම වදින චෙෆ් කෙනෙක් හොයන්න අමර කට්ටක් කෑවා)..අලුත් බිස්නස් එකට බොක්කෙන්ම මම සුභ පතනවා

කොරෝනා ලොක්ඩව්න් එකෙන් පොරට හිට් එකක් ආවත් වැඩ කරපු උන්ගෙ පඩි කැපුවෙ නෑ….උන් ඔක්කොටම තුන් වේලටම කන්න දුන්නෙත් මාලකයා

මම විශ්වාස කරන, ගරු කරන නියම පොරක් තමා මාලක.ඕන ප්‍රශ්නයක් පොර එක්ක කතා කරන්න පුළුවන්..එකම අවුල තියෙන්නේ ෆෝන් එක ආන්සර් කරන්නෙ නැති එක තමා.. ආ…අනිත් අවුල මට හැමදාම බනින එක..
“උබ පටන් ගන්න එක වැඩක්වත් හරියට ඉවර කරන්නෙ නෑ”….උබ උබේ ටැලන්ට් එක නිකන්ම වේස්ට් කරල දාන ගොනෙක්”

පටබැඳිගේ පැණිය

සිකුරාදා උදේ ක්ලාස් එක ඉවර වෙලා දවල්ට තඩි බත් එකක් කෙලලා මම ඇඳට වැටුනා…..
පැය භාගයක් ගියේ නෑ….

පුස් පුස්…
කියලා පිඹින සද්දයක් ඇවිත් මම ඇහැරිලා නැගිට්ටා….
දෙයි හාමුදුරුවනේ….තඩි නයෙක් මගේ ඇඳ ගාව…
පොර මගේ දිහා බලාගෙනම ඉඳලා උගේ හඬ අවදි කලා….

“දොරේ…මේ…ඔහේ බය උනැයි”????

මම යකෝ පුදුම උනා…අපේ බාසාව නේ මේක….මමත් ඇහුවා

“ඔහේ මාතරෙයි?”

“ඔව් දොරේ..අපේ මහ ගෙවල් මාතර”…..දැන් ඉන්නෙ කොළඹ….

මම : “ඉතිං අහවල් එහෙකටෙයි ඔහේ මාව හොයන් ආවෙ? ඔහේ මාව කන්නෙයි ආවෙ?

නයා : “ඔහේ මේ මගුලක් කතා කරන්න එපා  දොරේ…..මට ආරංචියක් ආවා මේ තව මාතර ඩෑල් එකක් ඉන්නවයි කියලා…
ගමේනෙ…
කොල්ලොනෙ…
පොඩි බිස්නස් එකක් කතා කරගන්න ආවෙ”

මම : “මට මක්කයි ඔහෙත් එක්ක කරන්න තියෙන බිස්නස්..මට ඔය නයි ටෝක්ස් දිරවන්නෙ නෑ”

නයා : “ඔන්න ඔන්න ඔහේ ඉතිං රෝන්ග් සයිඩ් එනෝනෙ….වැඩිය පුස් ටෝක්ස් ඉශූ කලොත් දශ්ට කරනවා මෙතනම් සෙත්තපෝච්චි වෙන්න”….කටයි..*කයි වහන් මම කියන එක අහන් ඉඳින්”

ඒම කිව්වම මාත් අම්බානක බය උනා….පොර කිව්වා වගේ මාත් කටයි *කයි වහ ගත්තා…

නයා: “මේකයි දොරේ….මම අඳුරන තව ඩෑල් එකක් ඉන්නව මොරවක දුලංග කියලා….පොර කරන්නෙ මී පැණි බිස්නස්…මේ දවස්වල ෆුල් හන්ටර් වෙලා ඉන්නෙ කොරෝනා කේස් එක්ක…පොර තමා මේ අයිඩීයා එක දුන්නෙ…….අපි අලුතෙන් පොඩි ප්‍රොඩක්ට් එකක් හැදුවා…..මී පැණි වලට ගංජා දාලා….

මම: “ඒ මොන අලුකෙත්තුරුවක්ද????ඔහේ මේ මක්කයි දොඩන්නෙ?…

නයා “පොඩ්ඩක් කට වහගනින්කො යකෝ කියලා ඉවර වෙනකම්…*බ්බ…

මම: හරි හරි…මම ආයෙ නිහඬ උනා

නයා “සුපිරි පැණිය දොරේ….ගහන ඕන එකෙක් සැපෙන් ඉන්නෙ….පුල් ආතල්….මමත් දවස් දෙක තුනක් හඳටත් ගිහින් ආවා…..

මම: “ඉතිං ඔහේ මගෙන් මොනැවැයි බලාපොරොත්තු වෙන්නෙ?”

නයා: “මේකනෙ දොරේ….ඔහේගෙ පේස්බුක එකේ රීච් එක හොඳයි නේ…අපි පොඩි ගේමක් ගහමු” ඔහේ ප්‍රෙස් කොන්පරන්ස් එකක් තියලා කියනෝ ඔහේ බෙහෙතක් හොයා ගත්තයි කියලා කොරෝනා වලට”….. මාත් ඔහෙත් එක්කම එන්නම් ප්‍රෙස් කොන්පරන්ස් එකට…ඔහේ කියනෝ මේ බෙහෙත හොයල දුන්නෙ මම කියලා….මාවත් පොඩ්ඩක් මාකට් කරනෝ හොඳේ?????

මම :”ඉතිං මේක බොරු බේතක් නෙ?? මිනිස්සු මේවා විස්වාස කරයිද??? අනික මේකෙන් ලෙඩ හොඳ වෙන්නෙ නෑ නෙ”

නයා: “මේ ලංකාව දොරේ….මුන් ඕන දෙයක් ගිලිනවා….ඕන නම් අපි ෆස්ට් රවුන්ඩ් එක නොමිලේ දෙමු….අපේ උන් නිකන් දෙනව නම් මන්න පාරක් උනත් කනවා දොරේ…..අනික දොරේ නයෙකුත් ප්‍රෙස් කොන්පරන්ස් එකේ ඉන්න නිසා ගැම්ම වැඩියි…..ඕනනම් අපි කියමු මම රාවණා ගාව හිටිය නයෙක් කියලා….නැත්නම් කියමු නාග ලෝකෙන් වැඩම කලා කියලා..අපේ උන් පට්ට ගොං දොරේ…ලෙඩේ හොඳ වෙන එකක් නෑ දොරේ….ඒ උනාට මේක බොන එවුන් සැපෙන් ඉඳිවී නේ දොරේ….අපි සල්ලි බෙදා ගමු…මාතර ගැම්ම දොරේ මාතර ගැම්ම…ගේමක් ගහමු දොරේ…ගේමක් ගහමු….

මම: “ගේමක් ගහමු…ගේමක් ගහමු…කියාගෙනම ෆුල් මොරාල් එකේ මම ඇස් ඇරියා….ශික් ඒක හීනයක්…..

කමක් නෑ….මේක තමා ඇත්ත පැණිය.. කාලක් 6999/=