මං මැරෙයිද අම්මේ

0731children01

ඇයි මයේ පුතේ එහෙම අහන්නේ?
එදා අම්මා එක්ක අන්තිමට ඉස්කෝලේ
ගිහිපු දවසේ යාළුවො
කථා වෙනවා මට ඇහුණා
මට කැන්සර් එකක් ලු
පිස්සු…මයේ පුතාට තියෙන්නේ
වෛරස් උණක්
අනේ අම්මේ
මෙහෙම තට්ටේ තියන් නම්
ඉස්කෝලේ යන්න බෑ
ළමයි අමුතු විදියට මං දිහා බලන්නේ
මේ බස් එකට නගිද්දීත්
දැක්ක නේ?
මම නම් ආයේ ඉස්කෝලේ
යන්නේ කොණ්ඩෙ වැවුනම තමා
දින කිහිපයකට පසු….
ඇයි අම්මේ අපි ගෙදර යන්නේ නැත්තේ….
මට මෙතන ඉඳල ඇති වෙලා
ලේ ගන්නවා ඉවරයක් නෑ
බඩ රිදෙන එක අඩු වෙන්නෙත් නෑ
තවත් දින කිහිපයකට පසු……..
අම්මා මට බොරු නේද කිව්වේ
මට කැන්සර් එකක් තමයි…..
මට ඇහුණා….
මං මැරෙයි අම්මේ
මම දවස් කීයක් තියෙනවද?
අම්මා ඔහොම අඬලා
කඳුළු පිහිදන් එන්න එපා…
අඬලා ඉන්නේ කියල පේනවා
තාත්තා වගේ ඉන්න
අක්කට කියනවද
මම ගාව දවසක් දෙකක්
නවතින්න කියල?
මට ආයේ ගෙදර
යන්න බැරි වෙයි නේ අම්මේ?
මගේ සෙල්ලම් බඩු ටික
මල්ලිට දෙන්න….
එයාට කියන්න
මගේ සෙරෙප්පුව කැඩුවට
මම තරහ නෑ කියල
ඔහොම දුකෙන් බලන්න එපා
අම්මේ…
මට ඕන හැම වෙලාවේම
අම්මා ළඟ හිටිය නේ…
දැන් නම්
හොඳටම අමාරුයි
අම්මේ…
මට යන්න වෙලාව
හරි වගේ….
අම්මා මට
පොරොන්දු වෙන්න
ආයේ අඬන්නේ නෑ
කියලා?
ආදරෙයි අම්මේ
හැමදාමත් මම
යන්නම් මම දැන්……

තවත් එක දවසක්…..

විනාඩි 3ක් අද පරක්කු උනා…
සුපර්වයිසර් සර් බැන්නේ මම හැමදාම පරක්කු වෙනවා වගේ….

මොනවා කරන්නද…
වතුර බිල වැඩීයි කියල බෝර්ඩිමේ ඇන්ටි ලිඳෙන් වතුර ගන්නලු..
ලිඳ ගාව පුදුම පෝලිමක්…
ලබන මාසේ ඉඳන් බෝර්ඩිමේ ගාණ වැඩි කරනවලු…

නංගි ගේ මගුල් ගෙදරත් ලඟයි…
ඒකෙ වියදමට තියන් හිටපු සල්ලි වලින් අම්මගේ බේත් ගත්තේ…
බේත් වලටම මාසෙට 15000ක් යනවා..
මල්ලි එහෙන් අඬනවා පන්ති සල්ලි ඉල්ලලා…..

ලබන මාසේ ඉඳල ඕ.ටී නැතිලු…
ඕර්ඩර් නැති නිසා සෙනසුරාදා වැඩ කරන්නේත් නෑලු
පපුව හෝස් ගාලා ගියා ඒක ඇහුවම
අනේ තාත්තාවත් හිටියා නම්…..

sewing operator efficiency

සල්ලි නම් මොනවද?
මිනිස්සු හම්බ කරපන්….
තාත්තා කිව්වා මතකයි
තාත්තා හම්බ කරපු මිනිස්සු….
මම පොඩි කාලේ මවපු හීන…
අපේ මහ ගෙදර…..
ඔක්කොම දේවල්
තාත්තා එක්කම ගියා

අම්මා කියනවා
උඹ ඔච්චර මහන්සි වෙන්න එපා කියල…
පොඩි කොල්ලට රස්සාවක් හොයලා
දීපන් උබලගේ වැඩපලෙන්ම

උඹ ඉගෙන ගනින් පොඩ්ඩෝ
මම උඹව ගොඩ දාන්නම්
මම, මම ගැන දැකපු හීන…..
උඹ සැබෑ කර ගනින්
දැන් ඉතින් මට…
කොහොමත් ඒවා හීන විතරයි…
එක දෙයක් පොරොන්දු වෙයන්
මට බැරි කාලේක
අම්මට හොඳට සලකපන්
මට සැලකුවේ නැතත්

– ලොකු අක්කා-

ඉඩම් පලහිලව්ව

50906329-man-begging-a-woman-for-love-by-giving-a-big-heart

සින්නක්කරේට
ලියා ගන්න
හිටපු හිත
එයාගෙ අම්මයි තාත්තායි
තෑගි ඔප්පුවකින්
වෙන කෙනෙකුට
පවරලා….
මුද්දර ගාස්තුත්
බරටම ගෙව්වලු……
දැන් එයාට ඒ ඉඩම
එපා වෙලා…..
ආයෙමත් කලින්
ඉඩම ගන්න ඇවිත්
ඒත් දැන් පරක්කු වැඩියි
කවුරුත්ම ගත්තෙ
නැති ඒ ඉඩම
අනූ නව අවුරුද්දකට
බදු දීලා

 

පාළුයි බං

අනේ නැගිටපන් බං
රිදුනාද උඹට
ඔහොම ඉන්න එපා බං
නැගිටලා වරෙන්
පාලුයි බං……………
උඹ කිව්වා හරි මචං
මම නෑ කිව්වට
අපි වල් බල්ලො තමා
පාරෙනේ ඉපදුනේ
ඉඳුල් නේ කෑවේ
පෙඩිගිරිය නැහැනෙ
දඩාවතේනේ ගියේ
ඒකයි අපි “වල්”
මම පිළිගන්නම්…..
අනේ දැන්වත් නැගිටපන්
පුරුදු උණුහුම
නුපුරුදු වෙනකොට
අමාරුයි මචං

3F57A2E100000578-4420838-image-a-19_1492508118160

හාල් මැස්සාගේ මළ ගෙදර

තෝරෙකුයි මෝරෙකුයි
වලියක් ගිහින්
හාල් මැස්සෙක්
තැලිලා මැරිලා
තෝරයි මෝරයි
වැරැදි නැහැලු
හාල් මැස්සා
බීලාලු ඉඳලා
තියෙන්න….
මෝරාගේ ශෝක
පණිවිඩය
“මුහුද හඬයි
ඔබ නිහඬයි”
තෝරාගේ ශෝක
පණිවිඩය
“කඳුළු ගඟට
මුහුද යටයි”
මළ ගෙදර
පැත්තකට
කොණකට
වෙලා අඬන
අම්මා කියනවා
“අලි කෙළිනකොට
අපි තැලෙනවා
කියලා උඹ
ඇහුවනම්
අදත් උඹ
ජීවතුන්
අතර පුතේ”

රේස් එකක් දිව්වා බං

life-race-rasamby.jpg

ඉස්කෝලෙන්
අවුට් වෙලා
රේස් එක
පටන් ගත්තා
දිව්වා එක දිගටම
අම්බානක දිව්වා
රෙකොර්ඩ්
කැඩෙනකම්
දිව්වා බං
ගොඩක් පදක්කම් දිනුවා
බිත්තිය පුරවලා
පදක්කම් ගැහුවා මචන්
එත්
දැන් නම් මහන්සියි බං
හති අරින්නත් බැරි වුනා
යන්තම් පොඩ්ඩක්
නැවතිලා පස්ස
හැරිලා බැලුවා
ඇස් දෙකේම කඳුළු
පිරිලා
ඔලුව බර වුනා බං

අත්තිවාරම
දාපු කණු දෙක
වැහැරිලා
මාව වැටෙන්න නොදී
තියන් හිටපු ඒ
කණු දෙක
දිරන්න අරන්

ඉස්කෝලේ එකට බත්
එක බෙදන් කාපු
දිමුවා මාව
දැකලා අහක බැලුවා බං
උගේ තාත්තා නැති වුන
දවසෙත්
මට රේස් එකක්
උගේ දුක අහන්න
ඌව බදාගෙන අඬන්න
මට බැරිවුණා බං

ජිමාගේ කොල්ලට
දැන් අවුරුදු තුනක්ලු
පොඩ්ඩා බලන්න
තාම ගියේ නෑ බං
අනේ මගේ
රෙද්දේ යාළුකම
රේස් එක ඉවර නෑ
සමාවෙයන් බං

කෝල් පිට කෝල්
දුන්නා සයිමා
අම්මා අසනීප
වෙලා
කවුරුත් නෑ බං
මගේ තනියට
ඉන්න වරෙන්
කියන්න
හිතේ තිබ්බ
දුක පිට කරන්න
එදත් බැරි වුනා
ලොකු රේස් එකක් බං

මට දැන් ඇති වගේ
පදක්කම් එක්ක
මම තනි වුනා බං
රේස් නවත්තලා
ආයේ එන්නම්
පුළුවන් නම්
යමු අපි
ඉඳිමු ඒ කාලේ
හිටපු විදියටම
වැරදිච්ච තැන්
හදාගන්න මට
උදව් වෙයන්…
තව එක දෙයක්
පුළුවන් නම් මට
සමාවෙයන්